Kowonaviris: enfografi sou ka konfime Ayiti ak Repiblik Dominikèn

Redaksyon an

Si yo rele Covid-19 la “pandemi”, se pa pou san rezon, men se paske li fwape prèske tout peyi sou latè an menm tan. Anreyalite, maladi sa se yon gwo defi pou Limanite an jeneral. Menmsi chak peyi sipoze fè jefò bò kote pa yo pou mennen batay la sou teritwa respektif yo, li klè kou dlo kòk se ansanm ansanm pou chay la leve toutbonvre.

Nan sans sa, yon kout je sou sitiyasyon lòt peyi pa yon move apwòch. Kanta konparezon done menm, se yon aspè enpòtan ki ka pèmèt chak peyi gade kisa pou l fè lakay li pou anpeche pi ta pi tris.

Ayiti ak Repiblik Dominikèn sitiye sou menm zile a. Se yon fwontyè tèrès ki separe yo. Li pa yon pèdi tan si nou raple w genyen anpil Ayisyen ki ap soti lakay vwazen epi rantre Ayiti san nou pa genyen kontwòl yo. Anplis, genyen 4 pwovens dominiken ki bay dirèk dirèk sou fwontyè a ki genyen ka konfime anndan yo. Kidonk, bagay la mande anpil refleksyon, anpil bon desizyon sou baz done ki klè.

Pou nou pa redui Kowonaviris la ak ti bout tè n ap viv ladan l lan sèlman, Port-au-Prince Post envite w, yon fwa ankò, gade enfografi sa ki ba w yon lide sou ansanm ka konfime yo nan peyi Dayiti ak nan peyi Sendomeng.

Enfografi sa konsidere dènye done Ministè Sante Piblik ak Popilasyon (MSPP) te pibliye nan jou ki te 12 avril 2020 yo ak done ki pibliye sou sit entènèt Jounalis Dominiken Nuria Piera jodi 14 avril 2020 an, apati enfòmasyon Ministè Sante Piblik Repiblik Dominikèn rann piblik.

Genyen 40 ka ofisyèlman konfime nan peyi Dayiti, alòske Repiblik Dominikèn totalize 3286. N ap pèmèt ou viv repatisyon ka sa yo sou kat Zile a. Apresa, se 425 tès Ayiti fè, pandan Vwazen an gentan sou 7162. Genyen 3 Ayisyen ki fè vwèl pou peyi san chapo pandan 183 Dominiken deja al bwè chat akoz maladi Kowonaviris la.

Founi je gade :

Port-au-Prince Post

Informer pour Changer