Yon rejim alimantè ekilibre, yon bon bagay nan moman kriz Kowonaviris lan
2 min read
Redaksyon an plis doktè Wilner Pierre
Tout sa nou mete nan asyèt pou nou manje chak jou, se yo ki egal rejim alimantè nou. Plis nou konsyan de sa nou dwe manje, se plis n ap ede kò nou rete an sante pandan n ap ede li goumen kont anpil maladi. Gen anpil rejim alimantè ki egziste, li enpòtan anpil pou w konnen ki rejim kap fè kò w pi byen, ki rejim ki mache ak mòd aktivite ke w ap mennen, elatriye.
Lè w ekilibre rejim alimantè w, se yon gwo avantaj pou kò w. W ap rive fè prevansyon pou yon dividal maladi. Si w se yon moun ki soufri kèk maladi tankou sik ak tansyon, espesyalis rekòmande pou w gen yon rejim vejetaryen sa vle di pou w pa manje vyann ditou. Paske sa anpil nan nou pa t ap vle kwè, vyann kapab reprezante yon gwo danje pou moun ki soufri maladi sila yo. Yon rejim alimantè ekilibre mande anpil disiplin pou w ka respekte pòsyon chak eleman nitritif kò a bezwen.
Nan moman malouk sa nou ye la a kote maladi ki rele COVID-19 la ap tayè banda preske toupatou sou latè, kote anpil moun mouri, anpil peyi ap rele sekou ; genyen anpil moun k ap benefisye bon lizay yo te genyen nan koze manje yo te konn manje. Li poko janm twò ta pou w rantre nan kategori moun ki aplike anpil prensip nan sa y ap manje yo. Menm yon gwo Doktè ki se Fondatè lamedsin ki rele Hyppocrate te di : « Sa w ap manje chak jou yo se premye medikaman pou kò w » . Kidonk, san nou pa rann nou kont, chak fwa nou manje selon lòd ak disiplin, se tankou yon bon remèd nou pote pou kò nou kont maladi nou pata menm imajine.
Eske gen yon manje espesyal pou w manje ki ka ede w goumen kont kowonaviris la ? Kesyon sa a ak anpil lòt te jwenn repons nan men yon espesyalis nan kesyon byen manje ki rele Dr Wilner PIERRE. Ekip sante Port-au-Prince Post la te poze kèk kesyon ak Dyetetisyen an. Pou w ka jwenn repons yo, nap envitew li enfografi a epi sitou gade videyo ki nan kò atik sa a …
Informer pour Changer
