Kowonaviris : pa pran medikaman san preskripsyon
2 min read
Redaksyon
Pandan pandemi kowonaviris la ap fè anpil dega, tout peyi ap batay pou mete do li atè. Malgresa, poko gen yon medikaman ni yo vaksen espesifik pou mete kowonaviris la KO a 100%. Sa ki fè chak grenn moun ap preskri pwòp tèt pa yo medikaman.
Se yon gwo danje nou pa dwe tonbe ladan l san nou pa gen dizon yon pwofesyonèl lasante. Bagay sa rele otomedikasyon. Se lè w pran medikaman ankenn doktè oswa famasyen pa preskri w oswa konseye w pran. Nan ka kowonaviris la, sa nou rele otomedikasyon an ka touye nou frèt. Ni pou prevansyon ni pou trètman kowonaviris la, otomedikasyon an pa dwe rantre nan jwèt la.
Pi gwo danje a se sitou pou moun ki prezante sentom ki sanble ak kowonaviris tankou la fyèv ak doulè epi ki deside pran medikaman tankou Ibipwofèn. Ibipwofèn nan danjere anpil nan ka kowonaviris la. Lè w pran li, medikaman sa ap pwovoke yon miltiplikasyon chaj viris la nan kò w, kidonk ka w ap vin pi grav e ou ka menm mouri.
Nan travay PAPPOST ap fè pou ede nou goumen kont kowonaviris la, aprè rechèch ak ti pale nou te fè ak moun ki metrize kesyon sa a, nou vin di w pinga ou pran medikaman pou kont ou sitou nan moman pandemi sa. Pa pran ibiprofèn ni pou fyèv ni pou doulè. Pi bon konpòtman pou nou genyen si nou ta va prezante sentom tankou fyèv, tous, ak doulè nan moman kowonaviris la se rete lakay nou epi rele otorite sanitè yo nan nimewo ki nan enfografi sa a ke n ap mande w byen li, konprann epi pataje.
Informer pour Changer
